#အရာနွံဂှ်သုၚ်စောဲအာတုဲ အရာဟွံမွယ်တံဂှ် ဓမံက်မာန်ပတိုန်အာအိုတ်ညိ၊
ချပ်ဂၠိၚ်သ္ၚောဲအာတုဲ ကၠိုဟ်လဝ်စိုတ်နူဘာသာညးတၞဟ်တုဲ ဒှ်သံသယပ္ဍဲဝေါဟာဂကူဇကုဂှ်မ္ဂးတှ်ေ ဣဏံညာတ်ၚုဟ်မးဝေါဟာလိက်ပတ်ဂကူဇကုသဝ်အာမဒှ်တုဲ ဟွံလအ် အရေဝ်မန်ပိုဲဟီုဒၟံၚ်လၟုဟ် လိက်မန်ပိုဲချူမံၚ်လၟုဟ်ဖအိုတ်ဂှ် သီုဒှ်လိက်မန်ဇေတ်တ်ဟွံသေၚ်တုဲ လ္ၚဵုဂှ်ဟီုမန်ပိုဲလွဳစနူဗၟာ လ္ၚဵုဂှ်ဟီုလွဳစနူသေံ လ္ၚဵုဂှ်ဟီုလွဳစနူတေံနူဏံဂှ် သရောပ်ထောံတှ်ေ မိက်သ္ဂောံဗဂဵုလဟဵုဟာ မိက်သ္ဂောံပြံၚ်သၠာဲအိုတ်ဟာ၊ ယဝ်ဒှ်ခိုဟ်တှ်ေ ဝေါဟာနွံမံၚ်တုဲတုဲတံဂှ် လ္ပဒှ်သံသယတုဲ သုၚ်စောဲအာညိ၊ အရာဝေါဟာဟွံမံက်ဟွံဂွံမိၚ်နကဵုရမျှာၚ်မန်တံဂှ်ဟေၚ်ရ ပိုဲတံထေက်ကဵုဒးမာန်ဗဒှ်ကေတ်ဂွံဂၠိုၚ်ဂှ်အိုတ်ညိ။
သာ်ဂှ်ဟွံသေၚ်တှ်ေ အခိၚ်အိုတ်အာအကြာတံဏံသၟးသၟးရ၊ ထေက်ကဵုပိုဲတံဒးကၠောန်ဒးချဳဒရာၚ်ဟီုဂှ် သွာၚ်နွံဒၟံၚ်တၟာအကးတၟာဒဵုဏီ၊ ၜိုန်ရပိုဲဏံဗှ်လ္ၚတ်နူလိက်ဘာသာဂကူညးတၞဟ်စောန်ကီုလေဝ် လ္ပဒှ်သံသယပ္ဍဲလိက်မန်ပိုဲအိုတ်ညိ၊ သာ်ဂှ်ဟွံသေၚ်တှ်ေ ဇကုဂှ်ဒှ်မၞိဟ်ကေတ်မံၚ်ဂုဏ်စရာဲထိုၚ်သးမံၚ်နူအရေဝ်လိက်ဂကူညးတၞဟ်ယျဂှ် ထေက်ကဵုဒးဂွံသတိအိုတ်ညိ။
( ယဝ်ရပိုက်တံဂၠာဲရိုဟ်မ္ဂးတှ်ေ လကျာ်တံလေဝ် ကဵုပိုန်ဟွံဂွံအိုတ်ရတုဲ ဟိုတ်နူမသြောံတံဂှ် ကၠုၚ်နူသၟဝ်ဂတာဇိုၚ်မၞိဟ်ဗြဴဗြဴတံလိုန်လဝ်၊ ဟိုတ်ဒှ်သာ်ဂှ်တုဲ နူမသြောံၜိုန်ရညးတၞဟ်လိုန်လဝ်ကီုလေဝ်၊ အခိၚ်ဒှ်ပုၚ်ဂှ် လ္ပကဵုညးတၞဟ်လိုန်တှ်ေ လကျာ်တံကဵုပိုန်ဂွံရ၊ သာ်ဏံဗွဲတုန်။
ဓဝ်သံသယကေုာံတၚ်သၟာန်မေၚ်မေၚ်မှ်မှ်ဂွံဆဵုဂွံမိၚ်ဒၟံၚ်ဇၟာပ်စက္ကတံဂှ် ကၠုၚ်နူကဵုပူဂဵုလေပ်လဝ်လိက်ဂကူညးတၞဟ်လ္ၚဵုတံဂှ်တုဲ သတိလီု လေပ်ဂၠိုၚ်က္ဍၚ် ဟွံလအ်စိုတ်ဂှ်ထိုၚ်သး ကေတ်မံၚ်ဂုဏ်စရာဲနူလိက်ညးတၞဟ် နူရမျှာၚ်ဂကူညးတၞဟ်တံဂှ်တုဲ ညံၚ်ရဴဍာတ်ကြောံကၠေၚ်မံၚ်ပ္ဍဲကအ်ပ္ဍဲဝိညာဏ်ဂှ်ဒှ်တုဲ ဒှ်ကၠုၚ်သံသယပ္ဍဲလိက်အရေဝ်ဝေါဟာဂကူမန်ဇကုအိုတ်ရ။
လ္ၚဵုဂှ်သ္ပတၟေၚ်တုဲ နကဵုဘာသာမန်ဇကုချူဏာဂွံကီုလေဝ်ဂှ်ဟွံချူတုဲ ချူထောံလိက်အေၚ်္ဂလိခ်မွဲၜါမတုဲ ချူစုတ်လိက်မန်မွဲၜါမတံဂှ်လေဝ်နွံ၊ လ္ၚဵုဂှ်ပၠန် တက်ကျာဟီုအရေဝ်ပၠန်လေဝ် မန်မွဲၜါမ ဗၟာမွဲၜါမ အေၚ်္ဂလိခ်မွဲၜါမ လ္ၚဵုဂှ်သီုသေံထုဲနှဴပါဒၟံၚ်ဂှ် ဣဏံမုအဓိပ္ပါဲရော၊ သွက်ညးဟွံလေပ်လိက်မန် ဟီုအရေဝ်မန်ဟွံအိုတ်တံဂှ် ဟွံညာတ်ဒုဟ်တုဲ မန်လ္ၚဵုတံ လိက်မန်လေဝ်စောန် နကဵုရမျှာၚ်မန်ဇကုဟီုဂွံကီုလေဝ် ဖေက်ဟွံမေၚ် ဖေက်ဟွံတၞဟ်ခြာအာတုဲ ထုဲနှဴထောံအရေဝ်ညးတၞဟ်လိက်ညးတၞဟ်ညိညမှ ဒှ်မေၚ်ဂတာပ်အခေတ်စံက်ဂး ။
လ္ပပံက်ခၞော်ဆုရလေဝ် သရောပ်နိဂီုကၠာ − − − ဗၠေတ်တှ်ေသၠးအခေါၚ်အိုတ်ဟေကောန်ၜိုပ်ထဝ်တအ်။
ไม่มีความคิดเห็น:
แสดงความคิดเห็น