ပၞာၚ်ကြုက် (လိဒုန်ကရေက် ဗါန်လဝ်တိကေုာံမြမောဝ်နာနာ)
ပၞာၚ်ကြုက်−−−မန်ကော်ပၞာၚ်ကြုက်ဂှ် ကြပ်ဟွံဗၠေတ်မံၚ်ရ၊ ယဝ်ကလေၚ်ရံၚ်ကျောဝ်အာ ပ္ဍဲမန်ပိုဲလောန်ကၠုၚ်ၜိုတ်ကၠံၜါကၠံသၞာံတေံဂှ် ပိုဲဟီုမံၚ်ပၞာၚ်ကြုက် နကဵုဒုန်တၞုၚ်သောဲသောဲ ဗါန်လဝ်ဖျုန်တိဖျုန်သကောဝ်ဆုမေါဝ်မောဝ်သၟူမောဝ်မောဝ်တံဂှ် ညးမွဲဟွံတီ ဟွံဂွံလုပ်စိုပ်ကၠုၚ်အကြာကွာန်ရးမန်ပိုဲဟေၚ်ရ။
−
ဒုန်တၞုၚ်သောဲသောဲဗါန်လဝ်မြမောဝ်သကောဝ်ဆုတိကလောံဏံဂှ် ကၠုၚ်နူဍုၚ်ကြုက်ပိုဲသမ္တီဒးတုဲ (ပၞာၚ်ကြုက်ဏံလေဝ် ဂကူလဵုဍုၚ်လဵုစကၠောန်ပတိတ်စသုၚ်စောဲကၠာဂှ်လေဝ်ဟွံတီကၠး၊ ဟိုတ်သာ်လဵုဒးကၠောန်ဗဒှ်ဗီုသာ်ဏံဂှ်လေဝ် ဟွံတီကၠး) ဂကူကြုက်တံလေဝ် သုၚ်စောဲဂၠိုၚ်ပ္ဍဲအရာပူဇဴကလော်ဗီုဓဝ်ပတေဟ်ဍေံတံတုဲ ဗွဲကြဴဏံ လုပ်စိုပ်ကၠုၚ်ပ္ဍဲမန်ပိုဲ နကဵုဗွဝ်ဖျာပရေၚ်ပိုန်ဒြပ်ကီု နကဵုအခေတ်ဓဝ်ပတေဟ်မွဲမွဲတုဲ ကောန်မန်ဗၟာတံလေဝ် စကာသုၚ်စောဲကၠုၚ်ဂၠိုၚ်ဂၠိုၚ်ရ။
−
ဟိုတ်ဏံဟေၚ် မန်ပိုဲကော်စပၞာၚ်ကြုက်ဒှ်မာန်၊ လပါ်ဗၟာကော်မံၚ် "မွှေးတိုင်" ဂှ် ညံၚ်တုပ်မံၚ်ကဵုဘာသာသေံကော်မံၚ် "ธูปหอม" ဏံရ၊ ဍုၚ်သေံနွံၜါဂကူတုဲ မွဲဂှ်မေါဝ် မွဲဂှ်ဟွံဟွံမောဝ်၊ လၟုဟ်ဍုၚ်သေံလေဝ် ဗဂဵုလဟဵုပတိုန်သွက်ဗွဝ်ဖျာဂှ် နူကဵုရိုဟ်မတ်ဂဥုဲဂြိုပ်နာနာ ဗဒှ်ဖျုန်သွက်ဂွံဗါန်ပ္ဍဲလိဒုန်ကရေက်ဂှ် ဂွံကိတ်ညဳကဵုဒၞာဲသုၚ်စောဲ ဗီုနွံပၟိက်မာန် ။
−
ယဝ်ရလညာတ်ပူဂဵုအဲတှ်ေ နကဵုယၟု"ပၞာၚ်"လေဝ် ဟွံမိက်ကော်မံၚ်ရ၊ ပၞာၚ်ပိုဲတီဂှ် ဒှ်ပၞာၚ်သ္ဍဴပူဇဴကျာ် ပၞာၚ်ဗုဗုလဒေါဝ်စုတ်ဇုက်တောဝ်တုဲ သွက်ဂွံစံၚ်ဂဵု ဗစုက်တူလေၚ်ကဵုဖျုန်ပၞာၚ်ဗွဲတုန်။
−
ယဝ်ဒးသုၚ်စောဲကလအ်ပူဇဴကျာ်ဓရ်သၚ်မ္ဂးတှ်ေ ဂွံကူချပ်တိတ်ဒးကေတ်ဒုန်ကရေက်ဗါန်လဝ်တိတံ ကော်စပၞာၚ်ကြုက်ဂှ် ကူဟွံစိုပ်ဟေၚ်၊ ဟီုမံၚ်ပၞာၚ်ကြုက်ဏံလေဝ် ဟိုတ်နူဗွဝ်ဖျာ ဟိုတ်နူပရေၚ်ပိုန်ဒြပ်တုဲ စိုပ်ကၠုၚ်အကြာမန်ပိုဲမာန်၊ ယဝ်အဲတှ်ေ အခိၚ်ဂမိတ်ဂၠိုၚ်မ္ဂး စၞးဒးဖ္ဍေန်ဂဥုဲဂမိတ်ဂှ် ပၞာၚ်ကြုက်ဏံရ အဲပကောံဂန်လဝ်ၜိုတ်စှ်တၞုၚ်ၜါစှော်တၞုၚ်တုဲ စံၚ်ဂဵုဟလုယက် ဗက်ဗဒဴဂမိတ်တံခိုဟ်အိုတ်ရ။
−
မုပဒးနွံမံၚ်ပ္ဍဲသ္ၚိအဲဂှ် ဟိုတ်နူပြဝကမၠောန်တၞဟ်တၞဟ်ကၠောန်လဝ်ဗီုအၚာပ်စိုတ်မၞိဟ်အခေတ်တံတုဲ ဂိုၚ်စွံလဝ်နွံ၊ ဒးသုၚ်စောဲဂှ်တှ်ေ ဗက်ဗဒဴဂမိတ်ဂှ် ခိုဟ်အိုတ်ရ။
−
ပၞာၚ်သ္ဍဴပူဇဴကျာ်ပိုဲစကာမံၚ်လၟုဟ်ဏံကဵု လိဒုန်ကရေက်ဗါန်လဝ်တိဂှ် စကာတုဲ ဣလဵု ပြသၞာအောန်မာန်ဂှ် ရံၚ်ကေတ်ညိ၊ လိဒုန်ကရေက်ဗါန်လဝ်တိဂှ် စံၚ်လေၚ်တူအိုတ်တုဲ သီုဒးကပှ်ဂိုၚ်ခၟိက်ပတေၚ်ဍေံဏီ၊ ပၞာၚ်သ္ဍဴဗုၜိုတ်ဂှ် စံၚ်အိုတ်အာတုဲ သီုကလေၚ်ဂွံအိက်ပၞာၚ်တုဲ အိက်ပၞာၚ်တံဂှ်လေဝ် ပေါတ်သ္ၚိနကဵုခၞော်သတ်ဗြဴလေဝ်ဂွံ ဟတဵုလးသ္ၚိလေဝ် ပလေဲနူဍာ်ဂဥုဲဂတာပ်အခေတ်တ္ၚဲဏံဂၠိုၚ်ဂၠိုၚ်ကဵုဆဏီ၊ တုဲပၠန် ကလေၚ်ဗဒှ်ဖျုန်ပၞာၚ်တၟိဂွံမံၚ်ဏီဏောၚ်ဂှ် နွံအိုတ်ၜိုတ်ဆဇုက်တောဝ်မွဲတၞုၚ်ရ။
−
ပၞာၚ်ကြုက်ပိုဲဟီုမံၚ်ဂှ် မူနူတမ်ဗီုလအာဍေံကၠောန်ဗဒှ်ဂှ် နဲကဲညးကဵုညး ဗီုသြန်တမ်ရိုဟ်ဂွံအောန်ဂှ် ပြိုၚ်ကၠောန်ဗဒှ်ကၠုၚ် ဗစိုပ်ကဵုမၞိဟ်သုၚ်စောဲတံတုဲ လဆောဝ်တှ်ေ ပိုဲဍေန်မံၚ်ပၞာၚ်ကြုက်ဂတသ္ၚိကျာ်ပိုဲ ဂတမုက်ကျာ်နိဗ္ဗာန်သတိက်လၟုဟ်ဏံဂှ် ဒှ်မံၚ်အိက်ဂၠဴအိက်သတ်တိရစ္ဆာန်တံကှ်ကှ် နှဴဗဒှ်လဝ်နကဵုဍာ်မောဝ်မောဝ်လေဝ် ဒှ်မာန်ဂှ် လ္ပဝိုတ်ထောံညိ၊ ယဝ်ဒှ်သာ်ဏံဏောၚ်တှ်ေ စံၚ်အိက်ပူဇဴဂတကျာ်ရ၊ ပိုဲမောဝ်မံၚ်ဂှ် လဆောဝ်တှ်ေ ပသအုဲညံၚ်ဇွလေဝ်ဒှ်ဂွံ၊ ဟိုတ်ဂှ်ရ ပၞာၚ်ပိုဲဍေန်ပူဇဴမံၚ်လၟုဟ် ဗုၜတ်ဂှ် စကာသုၚ်စောဲတှ်ေ ခိုဟ်အိုတ်ရ။
−
ဗွဲကိုပ်ကၠာ ပိုဲအာရာန်ပၞာၚ်ကြုက်မွဲဓုပ်မွဲထိုၚ်တှ်ေ တဆိပ်ဍေံဂှ် ပိုဲဆဵုမုရုပ်ရောဂှ် တီလဝ်ကၠးကၠးတုဲ မွဲကမ္မဏဳကဵုမွဲဂှ် စုတ်လဝ်တဆိပ်ရုပ် ဗီုဂွံတံၚ်စိုတ်ဓါတ်သွက်မၞိဟ်ရာန်တံ နာနာသာ်နဲစုၚ်ဇဳနွံ၊ လၟုဟ်တှ်ေ ဒှ်အာရုပ်ကျာ်ဂေါတမအပါပိုဲယျဟာဟွံတီ။
−
နွံမွဲပၠန်ဂှ် ပိုဲတံဂွံတီ ဣလဵုအရာပိုဲကၠိုဟ်စိုတ်ခိုဟ်မွဲဂှ်တှ်ေ−− ဥပမာဍေံ − ရုပ်ကျာ်နိဗ္ဗာန်သတိက်တုပ်တုပ်နွံၜါဒၞာဲ ပိုဲဟွံဆဵုညးကၟာတ်လဝ်တုဲ မ္ၚးဂှ် ညးဍေန်လဝ်ပၞာၚ်ကြုက်ကဵုပၞာၚ်ဗုၜတ်ဗီုပိုဲကေၚ်သုၚ်စောဲမံၚ်လၟိုန်ဂှ်မ္ဂး ယဝ်ညးကဵုရုဲပူဇဴမွဲတှ်ေ ပိုဲရုဲလပါ်လဵုရောဂှ် တီကေတ်မာန်ရ၊ ယဝ်အဲတှ်ေ လပါ်ပၞာၚ်ကြုက်ဂှ် သာ်လဵုလေဝ်ဒှ်အာဟွံမာန်ရ၊ သွက်ညးတၞဟ်ဂှ်ဟွံတီ၊ ဣဏံလညာတ်ပူဂဵုမွဲတုဲ ယဝ်ဗၠေတ်နွံတှ်ေ သၠးအခေါၚ် တၚ်ဂုန်ရ ။
✍✍✍
ဝိညာဏ်ထဝ်
ไม่มีความคิดเห็น:
แสดงความคิดเห็น