ဓရ်, ကၠောန်ကုသဵု, ကမ်, ဝိပက် −− တၞဟ်ခြာသာ်လဵုရော
−−
ဟိုတ်ဏံရတုဲ ဇၟာပ်မၞိဟ်ဒးနွံကဵုဓရ်၊ ဓရ်ဟီုဂှ် တပ်, ညဳ, တဝ်, လဒေါဝ်, သဘာဝ ဂွံအဓိပ္ပါယ်ရ၊ ဓရ်နွံမှ ကမ်ခိုဟ်ဝိပက်ခိုဟ်၊ ယဝ်ဓရ်ဟၟဲတှ်ေ ကမ်လေဝ်ပရေံ ဝိပက်ဂှ်လေဝ်ပရေံကၠုၚ်ကီု။
−−
ဟိုတ်ဏံဟေၚ် မၞိဟ်တ္ၚဲဏံ ဓဝ်ပတေဟ်ဗၠေတ်ဗၠေၚ်မံၚ်တုဲ ဒးနွံကဵုဓရ်ဟီုဂှ် ညးတံကၠိုဟ်ကေတ် ဒးကၠောန်ကုသဵုဂၠိုၚ်ဂၠိုၚ် ကဵုဒါန်ဂၠိုၚ်ဂၠိုၚ် ပၟဝ်ဓရ်ဂၠိုၚ်ဂၠိုၚ်တုဲ လပါ်ဒ္ဂေတ်စိုတ်ကမၠောန်ညးတံဂှ် ဒှ်မံၚ်ကမၠောန်ပရေံမွဲ၊ ဟွံတပ်, ဟွံညဳ, ဟွံတဝ်, လဒေါဝ်ဟၟဲ, သဘာဝဗီုဒးဒှ်ဂှ် ပြံၚ်သၠာဲအိုတ်တုဲ ယဝ်ဒှ်သာ်ဏံတှ်ေ ၜိုတ်ကၠောန်ဟလိုၚ်ကုသဵုကီုလေဝ် ကကၠောန်မကၠောန်ဒၟံၚ်မွဲလပါ်ပ္ဍဲပစ္စုပ္ပန်လ္တူမၞိဟ်ဂမၠိုၚ်ဂှ် ဒှ်ကမ်ပရေံမွဲတုဲ ဝိပက်ဂှ် သာ်လဵုလေဝ်ခိုဟ်အာဟွံမာန်၊ ကၠောန်ကုသဵုကဵုဒါန်ပၟဝ်ဓရ်ဟီုဂှ် ဒှ်ဖဵုခိုဟ်မွဲရ၊ ဆဂး ယဝ်ကၠောန်ကုသဵုပတုဲဒါန်တုဲ သွက်သ္ဂောံကဵုဇိုတ်ကၠေံကမ်ပရေံမကၠောန်ဒၟံၚ်လၟုဟ် ဂွံအိုတ်အးဟၟဲတံဂှ် ကုသဵုဂှ်ရီုဗၚ်ဟွံမာန်တုဲ ယဝ်ကမ်ပရေံတှ်ေ ကမ်မကၠောန်လဝ်တ္ၚဲဏံဂှ် ဒးဒုၚ်ဒးဆဵုဝိပက်ပရေံတ္ၚဲဏံသီုကဵုဘဝဂတတေံဟေၚ်ရ။
−−
ယဝ်တီဓရ် သီုပ္တုဲဒါန် သီုကၠောန်ကုသဵု သီုပၟဝ်ဓရ်ကီု သီုကမ်ခိုဟ်တ္ၚဲဏံ တီတုဲပလေဝ်စိုတ် မာန်စိုတ်ဇကုတုဲ ညံၚ်ဂွံဒှ်ကမ်ခိုဟ်လ္တူညးဂမၠိုၚ်မာန်ဂှ် ဣဏံမှ ပူဂဵုဂှ် တီဓရ် ဓရ်နွံ ကၠိုဟ်ဓရ်မွဲတုဲ အဃောဂျိုၚ်မံၚ်တ္ၚဲဏံလေဝ်ခိုဟ် ချိုတ်အာတုဲလေဝ်ခိုဟ်ဂွံအဓိပ္ပါယ်ရ၊ −−−− ကဵုအခေါၚ်ချတ်စုတ်ဗီုဒှ်တ္ၚဲဏံမွဲပရေၚ်ပရောညိ၊ သေဋ္ဌဳဍုၚ်မွဲဂှ် ညးတေံသ္ပကုသဵုသိုၚ်ဘာဒက်ကျာ်ကွေံကွေံ၊ ကာလကလေၚ်စဴသ္ၚိဂှ် ဒးဒုၚ်ပန်နကဵုလွဟ်အကြာဂၠံၚ်ဍာန်တုဲ ချိုတ်အာဟဂှ်၊ ပိုဲတီမွဲပ္ဍဲပစ္စုပ္ပန်လၟုဟ်ဂှ် သေဋ္ဌဳဒးချိုတ်အာဂှ် ဟိုတ်နူကမ်ညးမကၠောန်လဝ်ဟွံတပ် ဟွံညဳ ဟွံဒှ်လဒေါဝ်မွဲတုဲ ပ္ဍဲတ္ၚဲဏံဂှ်ဟေၚ် လပါ်ညးမွဲလပါ်တေံ ပအပ်ကဵုဝိပက်မကမ်သေဏာတ်တုဲ ဒးချိုတ်အာရ၊ ချိုတ်အာတုဲ ညးစိုပ်သွဝ်ဟာ နရက်ဟာဂှ် ဣဏံ ဓဝ်ပတေဟ်ဘွချိုတ်အာတုဲ။
−−
ဟိုတ်ဏံဝွံ ကုသဵုမပ္တုဲကၠောန်ဒၟံၚ်တ္ၚဲဏံဂှ် ကဵုကမ်ပရေံမကၠောန်လဝ်ဂှ်ပၠန် ပံၚ်တောဲလေဲဟပြေကေတ်ညးသ္ကံ ညံၚ်ကဵုပိုဲဒးလဝ်ဂတှ်တုဲ လေဲဟပြေကေတ်ဟွံဂွံ၊ သာ်ဏံဂှ် ဂွံအဓိပ္ပါယ် ယဝ်ဒစေၚ်အာမွဲကရေက်ဂှ် တုပ်သၟဟ်ဟွံဓဝ်ယာ ဟွံညဳသာ ဟၟဲကဵုပ္ဍဲပၞောန်တပ် ဟွံကွာ်ဍာန်လဒေါဝ်မွဲတုဲ တုပ်သၟဟ်ဟွံမွဲကဵု(ဓရ်)ရ၊ ဇေတ်ဇေတ်တေံဂှ် ဓရ်ဟီုဂှ်မုဟၟဲတုဲ ဓမ္မတာ သာမည သဘာဝမွဲရ၊ ယဝ်ဒးပတောံၜတ်ဥပမာဥပမေယျပၠန်တှ်ေ ဓရ်ဂှ် တုပ်သၟဟ်ကျာမွဲတုဲ ပ္ဍဲအခိၚ်ကျာလပိုက်လုက်စုက်ဒးခန္ဓပိုဲဏံဗက်ဂှ် တီကၠိုဟ်ကေတ် ဂံက်သောၚ်ဍောၚ်ပြေဇၟာပ်မၞိဟ်ရ၊ ဆဂး−−ကျာဂှ် ၜိုန်ရုပ်သာ်သၟူဍေံဟၟဲကီုလေဝ် ဇၟာပ်မၞိဟ်မိက်သ္ဂောံဗ္ဒမံၚ်ကဵုကျာ၊ မွဲသာ်ပၠန်ဂှ် တုပ်သၟဟ်ညံၚ်ရဴဍာ်ပလးပိုဲတံမသုၚ်ဒၟံၚ်လၟေၚ်လၟေၚ်တ္ၚဲဏံရ၊ ဍာ်ဂှ် ၜိုန်ရရှ်ဖှ်ဟၟဲကီုလေဝ် ဆဂး −− ဇၟာပ်သတ်နွံကဵုလမျီုတံဖအိုတ်ဂှ် ယဝ်ဍာ်ဟၟဲမ္ဂးတှ်ေ ဒးချိုတ်ဖအိုတ်၊ ဓရ်ဂှ်လေဝ် တုပ်သၟဟ်ညံၚ်ရဴသာ်ဂှ်တုဲ ပ္ဍဲပူဂဵုဂှ် ယဝ်စာ်စ္ဍးတိတ်အာဓရ်မ္ဂးတှ်ေ ဘွဂှ် ဂၠာဲတသိုက်စိုတ်ဝါတ်ကွေံကွေံတုဲ နွံဆပြသၞာဟွံရုဲအခိၚ်တုဲ လုပ်ကၠုၚ်မာန်။
−−
သရောပ်ထောံဂှ် သ္ပကုသဵုကဵုဒါန်ပၟဝ်ဓဝ်ဘာဝနာ ပရဟိတလေဝ် ခိုဟ်ဒၟံၚ်ဖအိုတ်ရတုဲ လၟေၚ်လၟေၚ်တ္ၚဲပိုဲတံသီုညးဖအိုတ်ဂှ် မချပ်ခိုဟ်, မဟီုခိုဟ်, မကၠောန်ခိုဟ်၊ မကၠောန်ခိုဟ်ဂှ် ကော်စကမ်ခိုဟ်တုဲ ဝိပက်ခိုဟ်မဂွံအဓိပ္ပါယ်ဖဵုခိုဟ်ဂှ် ဂွံဒုၚ်စသိုၚ်သီုပစ္စုပ္ပန် သီုအနာဂတဘဝဂတတေံ၊ −−− ယဝ်သရောပ်ထောံဂၠေံဂၠေံကွေံကွေံမွဲပၠန်ဂှ် (သွဝ်, နရက်, နိဗ္ဗာန်)ဂှ် နွံဒၟံၚ်ပ္ဍဲစိုတ်ပိုဲမၞိဟ်ဏံရ၊ သာ်ဏံဟေၚ် ဗုဒ္ဓဘာသာဂှ် ပတဝ်ဏာစိုတ်ဒှ်အဓိကလၟေၚ်မွဲ။
−−
တုပ်သၟဟ် (စိုတ်ဒှ်နာဲ ခန္ဓဒှ်ဍိက်) ယဝ်စိုတ်စကာဏာခိုဟ်မ္ဂး ခန္ဓဏံလေဝ်ဒဒိုက်သာခိုဟ်ရ၊ ယဝ်စိုတ်စကာကၠောန်ကမ်ပရေံပၠန် ခန္ဓဏံမွဲအလုံဖအိုတ်ဂှ် ဒှ်ဒဒိုက် ဒှ်ဍိက်ဟေၚ်၊ မုဟၟဲတုဲ နွံပ္ဍဲစိုတ် − ရံၚ်စိုတ်ညံၚ်ဂွံဆဵု ညံၚ်ဂွံမာန်စိုတ်တုဲ ပ္ဍဲအခိၚ်ဆဵုညာတ်စိုတ် မာန်စိုတ်မ္ဂးတှ်ေ ဆဵုရသွဝ်နရက်နိဗ္ဗာန်။
−−−
(လဆောဝ်လဆောဝ် သွဝ်နရက်နိဗ္ဗာန် နွံဒၟံၚ်ပ္ဍဲဂတမတ်ပ္ဍဲလၟုဟ်ဏံရဂှ်လေဝ် ဒှ်မာန်မံၚ်၊ ယဝ်ပိုဲတံရံၚ်စိုတ်မၞိဟ်လေပ်တှ်ေ ဆဵုကေတ်ဏောၚ်)
−−−−−−−−−−−−−−−−−−−−−−−−−−−−−−−−−−−−−−−−−−−−−−−
ဝိညာဏ်ထဝ်
ไม่มีความคิดเห็น:
แสดงความคิดเห็น