ချူလိက်ဂှ် ၚုဟ်မးနွံဗီုလဵုရော
ယဝ်ရဟီုအာချူလိက်ဂှ်ၚုဟ်မးနွံဗီုရောဏောၚ်တှ်ေ ဂုဏ်ဖဵုဗွဲမဂၠိုၚ်မံက်တိုန်ကၠုၚ် သီုကဵုပူဂဵုမချူလိက်ဂှ်ကီု သီုကဵုလိက်ဇကုချူလဝ်တံဂှ်ပၠန် ညးတၞဟ်ဂွံဗှ်တုဲ ဂွံဒှ်အာဗဟုသုတမာန်ကီု အဓိကဇၞော်အိုတ်ဂှ် မၚ်မွဲလိက်ပတ်ဂကူဇကုညံၚ်ဟွံဂွံကၠေံကၠက်အာကီုမဒှ်ရ။
ချူလိက်ဏံဂှ် ယဝ်ဒးပ္တောံပတုပ်ဏာကဵုဥပမာဥပမေယျမ္ဂးတှ်ေ ညံၚ်ရဴပိုဲတံဆူၜုန်ဆူမြကီုရ၊ ၜုန်မြတံဂှ် ပိုဲတံဆူလအ်ဂၠိုၚ်က္ဍၚ်ဏောၚ်တှ်ေ ကေက်ဂၠိုၚ်တိုန်က္ဍၚ်ဗွဲစၟတ်ဨကန်တရ။
ကၠေၚ်က္ဍဟ်ပိုဲမၞိဟ်ဏံလေဝ် ဗီုကဵုၜုန်မြကီုတုဲ ပညာပိုဲတံမလေပ်ဘာတုဲလဝ်တ္ၚဲဏံဂှ် ယဝ်ရပိုဲတံဟွံဗှ်လိက်ဟွံချူလိက်မ္ဂးတှ်ေ ခြာဟွံလအ် အခေတ်ဂှ်ၜက်အာဒၟံၚ်ဇၟာပ်စက္ကတုဲ ဟွံလအ် ပညာပိုဲမလေပ်တုဲကၠုၚ်တေံဂှ် လဆောဝ်တှ်ေဟွံဂတာပ်အခေတ်ဒှ်ကၠုၚ်မာန်ရ။
ကၠေၚ်က္ဍဟ်ပိုဲမၞိဟ်ဏံ ကမၠောန်ဂှ်ယဝ်ရဟွံဂွံကၠောန်လအ်လအာဏောၚ်တှ်ေ ၜိုန်နွံပ္ဍဲကၠေၚ်က္ဍဟ်တေံကီုလေဝ် ဆဂး အခိၚ်ပိုဲတံသုၚ်စောဲစကာကမၠောန်ဂှ် ကၠေၚ်က္ဍဟ်ပိုဲမၞိဟ်ဏံဂွံဂၠံက်ပ္တိတ်နၚ်ဗွဲတိုက်ရိုက်မြက်က်ဂှ်လဇုဲတဴရ၊ ဟိုတ်ဂှ်ရတှ်ေ ယဝ်ရပိုဲတံကၠောန်ဒၟံၚ်ကမၠောန်လၟိုန် ညံၚ်ရဴချူလိက်ဗှ်လိက်လၟိုန်တုဲ ကၠေၚ်က္ဍဟ်ပိုဲမၞိဟ်ဏံလေဝ် ဒှ်ညံၚ်ရဴပိုဲစကာဒၟံၚ်ကမၠောန်တုဲ အခိၚ်ပိုဲစကာဏောၚ်တှ်ေ ကၠေၚ်က္ဍဟ်ပိုဲဏံလေဝ် ကၠောန်ကမၠောန်ဗွဲတိုက်ရိုက် မုဟွံဒးကူချပ်မွဲသာ် အတိုၚ်သဘာဝဟေၚ်ကၠောန်ကၠုၚ်ကမၠောန်ခိုဟ်ခိုဟ်ဂတာပ်အခေတ်ရ။
ယဝ်ရပိုဲတံဟွံတ္ၚအ်ဗှ်လိက်ချူလိက်မ္ဂးတှ်ေ မုဍေံကဵုတဴဖဵုခိုဟ်ပရေံကဵုဘဝပိုဲဏံမာန်ဂှ် ဗဟုသုတအောန်စှ်ေကၠုၚ်သိုက်က်မာန်ရ၊ ပွမဝိုတ်ကၠုၚ်ပညာပိုဲလေပ်လဝ်တုဲတေံဂှ်သိုက်က်မာန်ရ၊ လဆောဝ်တှ်ေ သွဵုဗျန်ဂစိုတ်တံဂှ်လေဝ် ဝိုတ်ကၠုၚ်မာန်ရ၊ လညာတ်ကေုာံပွမပါ်ပါဲပိုဲဏံလေဝ် ဟွံဂတာပ်အခေတ်ဒှ်ကၠုၚ်မာန်ရ၊ ယဝ်ဟီုကၠးကၠးတပ်တပ်တှ်ေ ညံၚ်ရဴၜုန်မြတံဂှ်တုဲ စွံလဝ်လအ်လမ္ဂးတှ်ေ အခိၚ်ပိုဲစကာကမၠောန်ဂှ် ၜုန်မြတံဂွံကေက်ဗီုပိုဲနွံဗၟိက်ဂှ်ဒှ်အာဟွံမာန်ရ။
ဍောတ်တ်သောဲသောဲလေဝ် ဂုဏ်ဖဵုနူချူလိက်ဂှ်နွံတဴဗဝ်သအဝ်တုဲ လပါ်အရီုညးချူလိက်တံဂှ်လေဝ် နွံကဵုပွမညိၚ်ဝတ် စိုတ်ဟွံက္တဴတုဲ သမာဓိခိုဟ်ဟီုစရ၊ ရဲညးဟွံဗှ်လိက်ချူလိက်တံဂှ်ပၠန် စိုတ်က္တဴသၟးဟွံကတုဲ ဗဟုသုလေဝ်အောန်ကၠုၚ် တက်ကျာပသောၚ်ပြသၞာနာနာလေဝ် သုၚ်စောဲအရီုမ္ၚိုဟ်ကြံၚ်နကဵုဒေါသဂၠိုၚ်နူကဵုပွမတက်ကေတ်ကျာသ္ၚိတ်တ်နကဵုဟိုတ်ဖဵုကီုရ၊ ဟိုတ်ဂှ်ရတှ်ေ ချူလိက်လေဝ်ခိုဟ် ဗှ်လိက်လေဝ်ခိုဟ်တဴတုဲ ဘဝပိုဲမၞိဟ်ဏံ ဂွံဂျိုၚ်နွံကဵုၚုဟ်မးမွဲဂှ်လေဝ် နွံဆဂၠာဲသြန်ပြိုၚ်ပ္ကာန်သိုက်လောဲသၟးဟွံတုဲဟေၚ် ဗဟုသုတသွက်ဘဝၜိုတ်ထေက်ကြိုက်ဒးနွံကီုမှ ဘဝအဃောဂျိုၚ်သှ်ေနွံဒၟံၚ်ဏံဂှ် ပြသၞာအောန်တုဲ ဣဏံရဂျိုၚ်နွံကဵုၚုဟ်မး နွံကဵုကဵုအဓိပ္ပါဲသွက်ဇကုသီုကဵုညးဂမၠိုၚ်ရ။
သွက်ညးလေပ်ဒၟံၚ်ကွတ်(IT)အာဲထဳတံဂှ်ပၠန်တှ်ေ တ္ၚဲဏံချူလိက်ဟီုဂှ် နကဵုကၞေဟ်မှၚ်ဂှ်ဟွံဒးချူစကွေံတုဲ နကဵုလပှော်တဲပိုဲဏံစှ်တၞုၚ်ဂှ်လေဝ် ချူကေတ်မာန်အိုတ်ရ၊ ခိုဟ်ဂတာပ်အခေတ်အခေတ်သက်ဟီုဟွံမွယ်တုဲ ဒးကဵုတဆိပ်ၝောံတဲဒုတ်ဒုတ်ရနွံ။
သရောပ်ထောံတှ်ေ ကောန်ဂကူမန်ပိုဲတံသီုညးဖအိုတ်လေဝ် သီုကဵုညးတၠပညာ သီုကဵုညးချူဒးဗှ်ဒးတံဖအိုတ်ဂှ် အခိၚ်သၠးနွံတှ်ေ ဗှ်လိက်သၟးဟွံတုဲဟေၚ် ချူဝေၚ်လိက်ညိဂှ် ကၠောန်ဗဒှ်ကဵုကၠေၚ်က္ဍဟ်ပိုဲဏံ ဂွံကလိတ်ဒၟံၚ်တွဵုတုဲ ဒှ်သွက်ဂွံသှ်ပြသၞာနာနာပ္ဍဲဘဝပိုဲကောန်ဂကူတံရ။
ဝိညာဏ်ထဝ် − တၚ်ဂုဏ်ရအဴ
ไม่มีความคิดเห็น:
แสดงความคิดเห็น