#ၚုဟ်မးဂှ်နွံဒၟံၚ်ပ္ဍဲညးဂှ်ရော?
ၚုဟ်မးဟီုဂှ် ကဆံၚ်ညးကဵုညး ဒၞာဲညးကဵုညးဂှ်နွံဒၟံၚ်ဖအိုတ်တုဲ တိုန်တဴကဵုပိုဲဏံရံၚ်ဆဵုကေတ်ဟာဂှ် ဒှ်အဓိကမွဲရ၊ လဆောဝ်တှ်ေ အဃောနွံဒၟံၚ်ပ္ဍဲပိုဲဏံဂှ် ပိုဲဟွံစွံၚုဟ်မးတုဲ အခိၚ်စိုပ်အာပ္ဍဲတဲညးတၞဟ်တံဂှ်တှ်ေ နွံကဵုၚုဟ်မးသွက်ညးတၞဟ်ရ။
အရာလဵုမွဲ ယဝ်ပိုဲကၠောန်ဒၟံၚ်ဂၠိုၚ်ကဵုအလန် လအ်ကဵုသၞာံအခါဏောၚ်တှ်ေ လဆောဝ်ပၠန်ပိုဲဏံမၠိကၠုၚ်အရာဂှ်တုဲ ဟွံဆဵုကၠုၚ်ၚုဟ်မးအရာပိုဲမကၠောန်ဒၟံၚ်တံဂှ်သိုက်က်ရ၊ ဟွံလအ် ပြံၚ်သၠာဲတၟိထေၚ်ဂးခိုဟ်နူတြေံသာ်ဏံလေဝ် နွံဒှ်ပ္ဍဲစိုတ်ပိုဲမၞိဟ်ဏံအိုတ်ရ။
ဟိုတ်ဒှ်သာ်ဂှ်တုဲ တ္ၚဲဏံသ္ကံရဲပိုဲလေဝ်ခိုဟ် တြုံဗြဴပိုဲလေဝ်ပြေပြံၚ် ကမၠောန်ပိုဲမကၠောန်ဒၟံၚ်တ္ၚဲဏံလေဝ် ရုံဂပ်မံၚ်ရတှ်ေ အရာပိုဲဟွံပေၚ်စိုတ် ဒးဗက်ဗပေၚ်ဒၟံၚ်အၚာပ်စိုတ် ဗက်ပြိုၚ်ပ္ကာန်ဒၟံၚ်ကဵုညးဂမၠိုၚ်ဏောၚ်တှ်ေ အရာနွံပ္ဍဲပိုဲတ္ၚဲဂှ် ၜိုန်နွံကဵုၚုဟ်မးကီုလေဝ် ပိုဲဏံဟွံညာတ်အိုတ်ရ၊ ဟိုတ်နူကဵုပိုဲဏံချပ်ဗက်မိက်ဂွံပေၚ်ဗၟိက်စိုတ်သာ်ဏံဗွဲတုန်။
အရာလဵုနွံကဵုၚုဟ်မးဂှ် လဆောဝ်တှ်ေဒးသုၚ်အခိၚ်၊ လဆောဝ်တှ်ေဒးသုၚ်စောဲဓဝ်အေၚ်ဒုၚ်၊ လဆောဝ်တှ်ေဒးသုၚ်စောဲပွမကၠိုဟ်စိုတ်တုဲ ၚုဟ်မးနွံဒၟံၚ်ပ္ဍဲပိုဲဏံဂှ် ကဵုကၠုၚ်ဖဵုသွက်ဘဝပိုဲဏံသိုက်က်မာန်ရ၊ ယဝ်စိုတ်ပိုဲစံၚ်တူ ဟွံမွယ်ကဵုဟိုတ်ဖဵုသွက်ဘဝမ္ဂးတှ်ေ အရာနွံကဵုၚုဟ်မးပ္ဍဲပိုဲဏံဂှ် ဟွံလအ်ဒှ်အာကပေါတ်ဟွံမွယ်ကဵုၚုဟ်မးတုဲ အခိၚ်စိုပ်အာပ္ဍဲတဲညးတၞဟ်တုဲ ညးတၞဟ်ညာတ်ကေတ်ၚုဟ်မးဍေံဂှ်တှ်ေ ပိုဲကလေၚ်ကေတ်ဟွံဂွံရဂှ် ဒးလေၚ်အတိုၚ်မွဲဘဝရဏောၚ်၊ ဟိုတ်ဂှ်ရတုဲ ပေၚ်စိုတ်အရာပိုဲနွံဒှ်ဒၟံၚ်ပ္ဍဲပိုဲတ္ၚဲဏံအိုတ်ညိ။
သ္ဂုတ်သွာတ်မွဲမွဲမ္ဂးတှ်ေ သွက်ဘဝဂှ်ကဵုဖျုန်ဂၠိုၚ်ဂၠိုၚ်တုဲ သွက်အၚာပ်စိုတ်ဂှ် လ္ပဗက်စဂၠိုၚ်ညိ။
ไม่มีความคิดเห็น:
แสดงความคิดเห็น