အ္စာဘာၜံက်တိ

  အ္စာဘာၜံက်တိ

မ္ၚဵုသၞာံတၟိ(၂၀၀၀) ညးဂမၠိုၚ်မိပ်မြဟ်အီဂြိုၚ်ဂြုဂြုဂြီုဂြီု နာဲဆာန်မန်မွဲ ဂ္ဇံၚုၚ်ကသပ်အိုတ်ဍာန်ပိုတ်ဒၟံၚ်သွက်သ္ဂောံဂွံဂၠာဲကမၠောန်ဂှ်တုဲ ညးမွဲဓဝ်ၚုဟ်ၚဇြဟောမ်ဒၟံၚ်ပ္ဍဲဘာလကျာ်သုဓမ္မဝတဳ ကွာန်ၜၚ်ကဍဳဍုၚ်ၜၚ်ကံက်ဂှ်ရ၊

−

နာဲဆာန်မန် ဟိုတ်နူစလုပ်ဍုၚ်သေံတၟိတၟိတုဲ တၞးလိက်လုပ်ဍုၚ်ဒးသၞောဝ်ဂှ်လေဝ်ဟၟဲ ဟိုတ်ဂှ်ရ မံၚ်ဒၟံၚ်ကရောံသ္ကံရဲဇကုနူဘဝကေၚ်ဒှ်ဒၟံၚ်အ္စာတေံ ပ္ဍဲဘာၜၚ်ကဍဳဂှ်မွဲချိန်ခဏကၠာ၊

−

အကြာအကြာဂှ် နာဲဆာန်မန်လေဝ် စမံၚ်ပုၚ်ဘာသၟးလေဝ်ဟွံတုဲဒှ်ဟေၚ် နကဵုစိုတ်ဒှ်ကၠုၚ် ညံၚ်ကဵုဇကုတာလျိုၚ်ဟွံပြေလ္တူပုၚ်ဘာ စိုတ်တေံဍောတ်ကၠုၚ်တုဲ၊ နူဂှ် နာဲဆာန်မန်လေဝ် ဗ္တောန်မံၚ်ကဵုလိက်ဘာသာမန်ကုကွးဘာပ္ဍဲဘာဂှ်ညိညိညညအကြာအကြာဂှ်ရ၊

−

လောန်အာၜိုတ်ၜါပိဂိတု တ္ၚဲအာဒိုတ်နူဂယးပြဟ်မွဲတ္ၚဲ နာဲဗုၚ်တေၚ်ဒဳလုပ်ကၠုၚ်ကွဳစက်ကာပ္ဍဲဘာ သွက်သ္ဂောံဂၠာဲကောန်ကမၠောန်ၜံက်တိၜံက်မြံၚ်ကၠအ်၊ နာဲဗုၚ်တေၚ်စိုပ်အာပ္ဍဲဘာဂှ်တုဲ ဆဵုဒးဂကောံနာဲဆာန်မန်သီုသ္ကံရဲညးတံၜါပိတၠ၊ နာဲဗုၚ်တေၚ်တက်ကျာပရေၚ်ဂၠာဲသၟာကမၠောန်ၜံက်တိၜံက်မြံၚ်ရိုဟ်မြံၚ်ကၠအ်ကဵုနာဲဆာန်မန်တံရ၊

−

အေအဗၠာဲတံ − လၟုဟ်အဲကေတ်မံၚ်ကောန်ကမၠောန်မၞိဟ်ၜိုတ်မသုန်တၠဏောၚ် နာဲတံသၠးမံၚ်ရတှ်ေ အာကၠောန်ကမၠောန်ပ္ဍဲအဲကီုဟာ−နာဲဗုၚ်တေၚ်ဟီုကဵုဂကောံနာဲဆာန်မန်တံရ၊ ဓဝါဲဂှ် နာဲဆန်မန်သၟာန်နာဲဗုၚ်တေၚ်ၚုဟ်မးစရိတ်လိၚ်တ္ၚဲတုဲ− မွဲတ္ၚဲသြန်ၜါတ်သေံ(၂၀၀)သီုဗ္စကဵုပုၚ်မွဲဗဂါပ်ဏောၚ်နာဲဗုၚ်တေၚ်ဟီုကဵုနာဲဆာန်မန်တံ၊

−

ဗီုလဵုဂွံသ္ပ−−−ဘဝနာဲဆာန်မန်လေဝ် တိတ်ကၠုၚ်နူဍုၚ်ကွာန်ရးတေံ ကြပ်ပေၚ်အာပန်မသုန်ဂိတုယျတုဲ သီုဇက်လဝ်အိက်သြန်ညးကွာန်တံ ကောန်ဗြဴလေဝ်တမ်ကမၠောန်မုဟၟဲ ကၠအ်ဝါတံလေဝ် ပၞာန်ဗၟာအလဵုအသဳတံသီကေတ်ထောံဖအိုတ်၊ ချပ်အာအောန်စိုတ်ကဵုဘဝဇကုတုဲ− နာဲဆာန်မန်ဒုၚ်ကံပါၚ်−−−ယွံယွံအမူ အဲအာကၠောန်ကမၠောန်ပ္ဍဲအမူကီုဏောၚ်၊ သ္ကံရဲနာဲဆာန်မန်နွံၜါပိဂှ်လေဝ် ဗက်အာနာဲဗုၚ်တေၚ် အာကၠောန်ကမၠောန်မွဲစွံတုပ်တုပ်၊

−

ၜက်အာဒစာံဂိတုဗက်ဂှ် နာဲဆာန်မန်သီုသ္ကံရဲညးတံမၞိဟ်ၜါပိတၠဂှ် စှ်ေဗီုအာကဵုကမၠောန်ၜံက်တိၜံက်မြံၚ်ရိုဟ်မြံၚ်ကၠအ်တံဂှ်ဗွဲသဘာဝရ၊ နာဲဆာန်မန်လေဝ် ဂွံမသြန်ပကောံပကေဝ်လဝ်နူဒြဟတ်ၜံက်မြံၚ်ၜံက်တိတံဖအိုတ်ဂှ် အတေံလေဝ် ကောန်ဗြဴဇကုဂွံဟာပါၚ်မာန်လၟေၚ်လၟေၚ်တ္ၚဲ၊

−

အခိၚ်ဗ္တံၜိုတ်ဒစာံနာဍဳပြၚ်ပြၚ် နာဲဆာန်မန်ဂၠံက်ကေတ်ဗီုရုပ်ကောန်သ္ဍိုက်သမ္ဘာဆာန်ဇကု စွံလဝ်လ္တူသြိုဟ် ဗွဲမဗှ်သၞာသီုဍာ်ရမတ်ဇွောဝ်၊ အဵု−ဘဝအဲဘွအဲ, တ္ၚဲဏံအဲဒးကၠုၚ်သ္ပဍိက်ၜံက်တိကၠအ်ရသွံ၊ သီုအောန်စိုတ်သီုမိပ်စိုတ်ချပ်ကူအာပြးဇး− ၜိုန်ရအဲဒးၜံက်တိကီုလေဝ် ကောန်ဗြဴအဲဂွံမံၚ်ၜိုဟ်သိုဟ်တှ်ေတုဲရ−−−နာဲဆာန်မန်ဖျေံစိုတ်ကမၠောန်ၜံက်တိဂှ်ဗွဲမဗိုန်ဗတ်ချိုတ်ချိုတ်ပၠိုတ်ပၠိုတ်ဍာ်ဟဂၠိၚ်ရ၊−

−

လဆောဝ်လဆောဝ် နာဲဆာန်မန်သီုသ္ကံရဲညးတံ ဂေတ်ကၠုၚ်လပါ်ဘာၜၚ်ကဍဳဏံကီု ကၠုၚ်ဝေၚ်ကဵုဒါန်သ္ပကုသဵု၊ ဆဂး လပါ်ဂွံဗ္တောန်ကဵုကွးဘာတံလိက်မန်ဂှ် သိၚ်အာခြာကၠုၚ်သိုက်သိုက်တုဲ လပါ်တေံသေဋ္ဌဳကမၠောန်နာဲဗုၚ်တေၚ်ဂှ်ဇူဒိုအ်ဟွံဂွံဒးရုဲကေတ်မွဲလပါ်တွဵုတုဲ ဗီုလဵုဒှ်ဒှ်ရ− ဗုၚ်ဂၞဴဒးကၠုၚ်လၟေၚ်မွဲသွက်ဘဝတုဲ နာဲဆာန်မန်တံ ဒးကေတ်လပါ်ကမၠောန်ၜံက်တိဂှ်ဗွဲမဍာံစၟတ်၊

−

ဗွဲကြဴဏံ သ္ကံရဲနာဲဆာန်မန် ညးမွဲမွဲဒၞာဲ ပြးဇးအာဗီုညးဍာန်အဲအတိုၚ်သဘာဝတုဲ ဆဂး − နာဲဆန်မန်မွဲဓဝ် စဵုကဵုတ္ၚဲဏံလေဝ် ၜံက်ဒၟံၚ်တိဖိုဟ်၊ နာဲဆာန်မန်လေဝ် ကေၚ်ချပ်မံၚ်လၟိုန်လၟိုန်−− အဲၜံက်တိဏံလေဝ်သြန်ဟွံပရေံပုဟ်သွံ လၟုဟ်သြန်ဇက်လဝ်အိက်ညးတၞဟ်ဂှ်လေဝ် အိုတ်အာယျ− ကောန်ဗြဴအဲလေဝ်ဒဒိုက်သံက်သာ အဲဂွံသၠာဲကမၠောန်တၟိပၠန်လေဝ် ဖေက်ပရေံနူကမၠောန်ၜံက်တိဏံကွေံရ− လၟုဟ်သေဋ္ဌဳနာဲဗုၚ်တေၚ်လေဝ် ညးထပ်ဟလိုၚ်ခရိတ်ကၠောန်ကမၠောန် နူၜါကၠံစိုပ်ၜါကၠံပိစှော်၊ −− ၜိုတ်ဒှ်ကဵုဒှ်ရ− ညးတၞဟ်ဟီုအ္စာဘာၜံက်တိလေဝ်ဟဍေံရ− ဗုၚ်ဂၞဴလၟေၚ်မွဲသွက်ဘဝဒးကၠုၚ်ကၠာတုဲ အရာတၞဟ်တံဂှ် အဲဒးစွံလဝ်လၟေၚ်ၜါလၟေၚ်ပိဏောၚ်၊ ဓဝါဲဂှ် မွဲနာဍဳကလေၚ် ကၠဵုပ္ဍဲကၠအ်သတ်ဗြဴဂှ်ကဳ နာဲဆာန်မန်ဂွံသတိ ရပ်ဂွံနတိပတိုန်လ္တူပၞးအာကိုဟ်ဆာဲတုဲ ကလေၚ်ဆက်ၜံက်အာတိညးမွဲဓဝ်−−−−အုပ်နိဂီု ။

−−−−−−−−−−−−−−−−−−−−−−−−−−−−−−−−−−−−−−−−−−−−−−−−−−−−−−−−−−−−−−−−−

ဝိညာဏ်ထဝ်