ဗှ်လိက်ဂှ် ၚုဟ်မးနွံဗီုလဵုရော
တ္ၚဲဏံ လိက်ပတ်မန်ပိုဲလေဝ်ဂတာပ်ကၠုၚ်အခေတ်ယျတုဲ လ္တူလပှ်လေဝ် ဂွံဗှ်ဂွံချူကၠုၚ်မာန်ဗွဲမလောဲသွာကီုရ၊ ဟိုတ်ဒှ်သာ်ဂှ်တုဲ တ္ၚဲဏံပိုဲကောန်ဂကူမန်တံ နွံတဴဋ္ဌာန်ဇဳၜဳကၠောံဟီုစဂွံတုဲလၟေၚ်မွဲဂှ် ပိုဲတံစွံလဝ်တိုၚ်ပ္ကဴသြန်တုဲ ဒးဂစာန်ကၠောန်ကမၠောန်ဒးကူချပ်မံၚ်လပါ်သ္ဂောံဂွံသြန်ဂၠိုၚ်ဂၠိုၚ်တုဲ ဇၟာပ်ဇၟာပ်မိဏေတ်နာဍဳစက္ကဟီုဂှ် အာရီုအာနွံဒၟံၚ်လပါ်ဂၠာဲပကောံထဝ်သြန်ကဵုဖျုန်ဂၠိုၚ်ရ။
ကၠောန်ကမၠောန်ပကောံထဝ်သြန်သၟးလေဝ်သွက်ဘဝဟီုဂှ်ဍေံတုဲဟာယဝ်သၟာန်မ္ဂးတှ်ေ ဒးဟီုကၠးကၠးတပ်တပ်ဓဝ်ဓဝ်သောၚ်သောၚ်ဏောၚ်ဂှ် ဟွံဍိုက်ပေၚ်ဏီပုဟ်သွက်ဘဝပိုဲတ္ၚဲဏံဟီုမာန်ရ။
ညံၚ်ရဴကမၠောန်ပိုဲကၠောန်ဒၟံၚ်တ္ၚဲဏံ ဂွံပြေပြံၚ်ကီုပြသၞာနာနာညံၚ်ဟွံဂွံလုပ်ကၠုၚ်ပ္ဍဲဘဝလၟေၚ်လၟေၚ်တ္ၚဲပိုဲဏံဂှ် ဣဏံဒှ်အဓိကမွဲတုဲ မုပိုဲတံဒးဗက်ဗပေၚ်စုတ်ပ္ဍဲဘဝပိုဲဏံဂှ်ရောဟီုတှ်ေ စၞစကၠေၚ်က္ဍဟ်မွဲ ပိုဲတံဂါံၜက်ထောံဟွံဂွံတုဲ ဟိုတ်နူအတိုၚ်မွဲခန္ဓကာယ(၃၂)ပိုဲမၞိဟ်ဏံဂှ်ဒးကၠောန်ဒၟံၚ်ကမၠောန် ဒးသ္ဂုတ်သွာတ်ဒၟံၚ်အရာနာနာဇၟာပ်စက္ကတုဲ ဟီုသာ်ဂှ်တှ်ေ ဒးနွံကဵုအရီု ဒးနွံကဵုသတိ ဒးနွံကဵုသမာဓိဏောၚ်မှ ကမၠောန်ပိုဲမကၠောန် အဃောပိုဲဏံမသ္ဂုတ်သွာတ်ဒၟံၚ်ဖဵုမွဲမွဲ ညံၚ်ဂွံနွံကၠုၚ်ကဵုၚုဟ်မးသွက်ဘဝပိုဲဏံဟီုဂှ်တှ်ေ မွဲ−ပွမချပ်၊ ၜါ−ပွမဟီု၊ ပိ−ပွမကၠောန်ဟိုတ်ဨပိတၚ်ဏံခိုဟ် ကမၠောန်ဂှ်ဂွံပြေပြံၚ်ပြသၞာအောန်တုဲ ယဝ်ပိုဲတံသရောပ်ထောံဏောၚ်တှ်ေ ဍေံကၠုၚ်နူလဵုရောဂှ် ပိုဲတံတီကေတ်မာန်ရ။
ဗွဲစၟတ်ဨကန်တံ ဍေံကၠုၚ်နူကဵုကၠေၚ်က္ဍဟ်ပိုဲဏံမွဲဟေၚ်ဆဵုကေတ်မာန်ရ၊ ဟိုတ်ဒှ်သာ်ဂှ်တုဲ ကၠေၚ်က္ဍဟ်ပိုဲဏံ ဂွံနွံကၠုၚ်ကဵုစၞစခိုဟ်ဟ်သွက်သ္ဂောံသ္ဂုတ်သွာတ်ကမၠောန်အရာနာနာမာန်ဂှ် ဒးနွံကဵုဗဟုသုတ ဒးနွံကဵုပွမကၠိုဟ်စိုတ် ဒးနွံကဵုတီဂၠိုၚ်ညာတ်ဂၠိုၚ်မိၚ်ဂၠိုၚ်တုဲ သီုဖအိုတ်ဂှ် ဍေံကၠုၚ်နူကဵုပိုဲဏံဗှ်လိက်ဂၠိုၚ်ဂၠိုၚ်မဒှ်ရ၊ ယဝ်ရပိုဲတံ ချူလိက်ဂၠိုၚ်ဂၠိုၚ်ပၠန်လေဝ် ပဵုတုဲဗဟုသုတနာနာဍိုက်ပေၚ်ကၠုၚ်ပ္ဍဲဘဝပိုဲဏံဗွဲမလောန်ရ။
ယဝ်ရပိုဲတံဂွံဆဵုကေတ် သေဋ္ဌဳကဆံၚ်သၠုၚ်သၠုၚ်တံကီု သာ်ဂှ်ဟွံသေၚ်တှ်ေ သၟာပရေၚ်ပိုန်ဒြပ်ကဆံၚ်သၠုၚ်သၠုၚ်တံဂှ်ကီု ညးတံသ္ဂုတ်သွာတ်ကမၠောန်ညးတံညံၚ်ဂွံစိုပ်အာတိုၚ်ပ္ကဴဟီုဂှ် သီုဖအိုတ်ကၠုၚ်နူမဒှ်မၞိဟ်တ္ၚအ်ဗှ်လိက်ဖအိုတ်ဂၠိုၚ်ဟီုမာန်ရ၊ ဣဏံရၚုဟ်မးဗှ်လိက်သွက်ပိုဲမၞိဟ်တံ၊ ဆၜိုတ်ဏံသၟးဟွံသေၚ်တုဲ ယဝ်ပိုဲတံဗှ်လိက်ဂၠိုၚ်ဂၠိုၚ် လိက်ဂကူညးတၞဟ်လေဝ် ယဝ်ပိုဲတံဗှ်မာန်ဏောၚ်တှ်ေ ပဵုတုဲဗဟုသုတဂၠိုၚ်ကၠုၚ်နဲကဲစုၚ်စဳပ္ဍဲလညာတ်ပိုဲဏံမာန်ရ။
အခိၚ်ဆဵုပြသၞာမွဲမွဲကီု ဆဵုအခက်ခုဲမွဲမွဲကီု သီုကဵုဆဵုတၚ်ဝါတ်ဂါတ်သွက်ဘဝကီုလေဝ် လညာတ်ပိုဲဏံကေဝ်ဇြုၚ်သၠးဗွးတုဲ ညာတ်ကေတ်ဘဝဗွဲမကၠးဖ္ဍးမာန် ဂၠိုၚ်နူညးတၞဟ်ဏီရ၊ ဟီုဂးတက်ကျာ ပ္ဍဲအရာပသောၚ်ပြသၞာလေဝ် ဂွံဟီုဂၠိုၚ် ဂွံပါ်ပါဲထ္ၜးဟိုတ်ဖဵုနာနာမာန်လ္တူညးတၞဟ်တုဲ ဣဏံရဗဟုသုတ ကော်စဂဥုဲကၠေၚ်က္ဍဟ် စၞစကၠေၚ်က္ဍဟ်ရ၊ စၞစကၠေၚ်က္ဍဟ်ခိုဟ်ခိုဟ်နွံပ္ဍဲပိုဲဏံတုဲ သွက်ပိုဲဏံကီု သွက်ဂကောံအိန်ထံၚ်ပိုဲဏံကီု သီုကဵုညးနွံဗွဳဗွိုၚ်ဗ္ဒါဲပိုဲဏံကီု သီုကဵုဗဂဵုလဟဵုသွာၚ်နာနာသီုဖအိုတ်ဂှ် ဂွံနွံကၠုၚ်ကဵုတိုၚ်ပ္ကဴ သ္ၚောဲခြာနူပြသၞာနာနာလၟေၚ်လၟေၚ်တ္ၚဲတုဲ ဣဏံရ ပိုဲတံဆဵုကေတ်ၚုဟ်မးဗှ်လိက်မဒှ်ရ။
ယဝ်ရဟီုမွဲဗီုပၠန်တှ်ေ ဗှ်လိက်ဏံဂှ် ကၠောန်ဗဒှ်ကဵုပိုဲဏံ ပွမတီ ပွမကၠိုဟ် ပွမညာတ်ကၠးသ္ၚောဲနူကဵုညးတၞဟ်တုဲ အခိၚ်သှ်ေနွံဒၟံၚ်ပ္ဍဲဘဝပိုဲဏံ မူစိနာဍဳ မူစဳမိဏေတ် မူစိစက္ကဂှ် တသိုက်ဂၠိုၚ်တုဲ ဒဒိုက်ပြသၞာဂှ်နွံအောန်တဴစဵုကဵုဟွံမွယ်ဒှ်မာန်ရ၊ အိုတ်ကၞောတ်သရောပ်ထောံဏောၚ်တှ်ေ သီုကဵုသၟတ်တံ သီုကဵုကောန်ဂကူမန်ပိုဲဍောတ်လဒေါဝ်ဇၞော်ဗျုတံသီုဖအိုတ်ဂှ် အခိၚ်သၠးနွံဏောၚ်တှ်ေ လ္ပဖအိုတ်ထောံအခိၚ်တုဲ မ္ၚးနူဝေၚ်ဗီုအၚာပ်စိုတ်ပိုဲဏံဂှ် စွံလဝ်အခိၚ်ဗှ်ဝေၚ်လိက်အိုတ်ညိ၊ ယဝ်ဒှ်ခိုဟ်ဏောၚ်တှ်ေ ချူဝေၚ်လိက်အိုတ်ညိ။
တ္ၚဲဏံအခေတ်လ္တူလပှ်ကျာလေဝ် လုပ်စိုပ်ပ္ဍဲဘဝပိုဲကောန်ဂကူတံယျတုဲ တၚ်ဝါတ်ဂါတ်ဗှ်လိက်ချူလိက်ဂှ်ဟွံမွယ်ဟေၚ် နကဵုလပှော်တဲမွဲတၞုၚ်ဂှ် ပိုဲဏံဗှ်လိက်ချူလိက်ဂွံကၠုၚ်မာန် ဗွဲမလောဲလောဲသွာသွာတုဲ အခေါၚ်နွံသီုညးဖ္အိုတ်ရ၊ သရောပ်အိုတ်ကၞောတ်ဏံဂှ်တှ်ေ ဗှ်လိက်ချူလိက်ဂှ် ဒှ်စၞစကၠေၚ်က္ဍဟ် ဒှ်ဂဥုဲကၠေၚ်က္ဍဟ်ပိုဲမၞိဟ်တံသီုညးဖ္အိုတ်ရအဴ။
အဲဝိညာဏ်ထဝ် အုပ်ကၠေံနိဂီု ၜိုတ်ဏံကၠာရ၊
ไม่มีความคิดเห็น:
แสดงความคิดเห็น