ဣဏံကမၠောန်ပူဂဵုဇကု၊ ဣတေံကမၠောန်ဒှ်ဖဵုသွက်ဂကူသွက်ညးဂမၠိုၚ်ဂှ် ထေက်ကဵုဒးပါ်ပါဲဒးအိုတ်ညိ၊ သာ်ဂှ်ဟွံသေၚ်မ္ဂးတှ်ေ မုဗဂဵုလဟဵုလေဝ် သက်လဝ်ပၞောန်ဒးဒှ်အၚပ်စိုတ်ပူဂဵုဇကုတွဵုဏောၚ်တှ်ေ ဖဵုသွက်ညးဂမၠိုၚ်ဟီုဂှ် ဟွံမွယ်လီုကၠုၚ်မာန်ရ။
အဓိကဇၞော်အိုတ်ထေက်ကဵုပိုဲတံဒးချပ် ဒးဟီု ဒးကၠောန်ဂှ်တှ်ေ ဖဵုခိုဟ်မွဲဟေၚ် ဒးစဳရေၚ်ပူဗိုၚ်ညးသ္ကံ ဒးဗိုၚ်ဗပေၚ်ဒြဟတ် ဒးဗိုၚ်ထံက်ပၚ် ဒးဗိုၚ်ဒလောံဗတောန် ဒးဗိုၚ်ဗဂဵုလဟဵုအာညးသ္ကံအိုတ်ညိ၊ သာ်ဂှ်ဟွံသေၚ်မ္ဂးတှ်ေ ဇကုလေပ်အိုတ်စောန်အိုတ်ဂှ် ဒှ်ကၠုၚ်ပ္ဍဲစိုတ်တုဲ သွက်ညးဟွံတီပိၜါဂှ် ဒှ်အာမၞိဟ်ကဆံၚ်သဝ် ဗဟုသုအောန်ပ္ဍဲလညာတ်ညးတံအိုတ်ရ။
လေပ်စောန်ကၠိုဟ်တီဂၠိုၚ်ဂှ်ခိုဟ်ရတုဲ ဣဏံဟေၚ်ရ ဒှ်သဇိုၚ်ပူဂဵုသွက်ဂွံချပ်ခိုဟ် ဟီုခိုဟ် ကၠောန်ခိုဟ်တုဲ ဖဵုမတိတ်ကၠုၚ်တံဂှ်လေဝ်ခိုဟ်ဂွံဟီုအိုတ်ရ၊ သာ်ဂှ်ဟသေၚ်မ္ဂးတှ်ေ ကေတ်မံၚ်လာပ်ဗဇဴပူဂဵုဇကုဇၟာပ်စက္ကပွမချပ်ဏောၚ်ဒှ်မ္ဂး လညာတ်ကီု လဟီုကီု ကမၠောန်ကီုတံဂှ် ဒှ်အာသွပံၚ် ထုဲနှဴအာအိုတ်တးဗွဲစၟတ်ရ။
ညံၚ်ရဴအှော်မွဲစန် ဇုက်မွဲတၞုၚ် ခိုၚ်ဗိုန်ညဳသာ နကဵုစေတနာအးအး ယဝ်ဗဂဵုလဟဵုမ္ဂးတှ်ေ တိုၚ်ပ္ကဴတိက်လ္ပံညာတ်လဝ်နူဗ္တံဂှ် ဟွံလအ်ဒှ်သွပ်လ္ပံဍာံဇေတ်ဨကန်တံရ။
ไม่มีความคิดเห็น:
แสดงความคิดเห็น