ပေါဲရုဲမာဲတုဲယျဏောၚ်တှ်ေ ဒးဆက်ကၠောန်မံၚ်ကမၠောန်ဏီ
ချပ်−ဟီု−ကၠောန်၊ ပိဏံဍိုက်ပေၚ်မှ ဂွံပစူၝောံတဲ
မိပ်ကၠောန်သဘၚ် ကျဍာန်ညးညးဂြိပ်ဒဴဂှ်လ္ပကဵုဒှ်တုဲ ဣဏံဂှ်ပိုဲစိုပ်တိုၚ်ပ္ကဴရဟီုဟွံဂွံဟေၚ် ဗွဲတၟေၚ်ဂွံအခေါၚ်ကၠောန်ကမၠောန်ညိညဓဝ်ရ၊ ဟိုတ်ဒှ်သာ်ဂှ်တုဲ ညးကွာန်သာမညမွဲကၠိုဟ်ကေတ်ဂှ်တှ်ေ ဣဏံမန်ပိုဲဂွံဍုၚ်ယျတုဲ ပံက်သိုဟ်အိုဟ်တၟိုဟ်တဴအိုတ်ရ၊ ၜိုတ်ဏံဂှ် ဖဵုသွက်ဂကူမန်ပိုဲ ဖဵုသွက်ကွာန်မန်ပိုဲတံဂှ်ဍိုက်ပေၚ်ယျဟာယဝ်သၟာန်တှ်ေ မုဟွံမွယ်ဏီတုဲ အရာဂွံဒးပြံၚ်သၠာဲဂွံဒးဗဂဵုလဟဵုဂှ်လေဝ် နွံတဴဗဝ်သအဝ်ဏီတုဲ တီမံၚ်မိပ်သၟး တီမံၚ်ကၠောန်သဘၚ်သၟး တီမံၚ်ဒုၚ်တၠုၚ်သၟး တီမံၚ်စံၚ်ဝေၚ်သြန်သၟးဂှ် ညံၚ်ကဵုသတိလီုအာတုဲ ရံၚ်ကဵုအခိၚ်အခေတ်ကာလမ္ဂးတှ်ေ ညံၚ်ကဵုညဳသာပ္ဍဲသဘၚ်သၟးရဂၠိုၚ်ဂွံဆဵုကေတ်ရ။
မိပ်ဒုၚ်တၠုၚ်ဟီုဂှ် ပရေံရဟွံသေၚ်တုဲ အခေါၚ်နွံကၠောန်ဂွံတုဲ ဆဂး ပိုဲတံမံၚ်နွံဒှ်ၜိုတ်ဏံရဟာဂှ်ဟွံသေၚ် အရီုလပါ်သွာၚ်တၞဟ်ဟ်လေဝ် ပိုဲဒးညဳသာညံၚ်ရဴကၠောန်သဘၚ်လှ်ေဒယှ်ေဗုတ်မံၚ်ဏံကီုတှ်ေပဵုခိုဟ်ဂၠိုၚ်မိက်သ္ဂောံထ္ၜးလညာတ်ကီုရ။
ဗီုမန်ပိုဲညဳစုတ်မာဲဏံကီု ဗီုမန်ပိုဲမိပ်ဒုၚ်တၠုၚ်အမာတ်မန်ပိုဲဂှ်ကီု ဗီုမန်ပိုဲဗုတ်လှ်ေဒယှ်ေဇၟာပ်ပ်ကွာန်ညးကဵုညးဂှ် သွာၚ်တၞဟ်ဟ်လေဝ် မိက်သ္ဂောံကဵုတုပ်ဗီုကဏ္ဍစုတ်မာဲဒုၚ်တၠုၚ်ဏံဏောၚ်တှ်ေ နဲကဲပြံၚ်သၠာဲဂကူမန်ပိုဲ နဲကဲဗဂဵုလဟဵုဂကူမန်ပိုဲဂှ် စိုပ်အာတၟာဇမ္ၚောဲဂတမတ်ဂကူညးတၞဟ်မာန်ရ။
ဟိုတ်ဒှ်သာ်ဂှ်တုဲ အရေဝ်လဒေါဝ်ဂှ်ဟွံဟီု ဟီုနကဵုလညာတ်ပူဂဵုပေၚ်ပေၚ်ဏောၚ်တှ်ေ မန်ပိုဲညဳသာဂှ် နွံဆအရာမိပ်မိပ်မၞိဟ်ဂၠိုၚ်ဂၠိုၚ် ပေါဲဝိုၚ်စဳက္ဍၚ်မၞိဟ်ကောံဂၠိုၚ်က္ဍၚ်ရ၊ ယဝ်ရဒးပါ်ကရေက်ထောံတှ်ေ ပွမကၠောန်သဘၚ်မိပ်မိပ်ဂှ် မန်ပိုဲစွံအရီုဂၠိုၚ်နူကဵုဟိုတ်ဖဵုတၞဟ်ဟ်တံရ။
အခိၚ်ပံက်ဘာမန်စိုပ်ကၠုၚ်ယျဏောၚ်တှ်ေ ဒုၚ်တၠုၚ်အ္စာဘာတြုံဗြဴတံဗီုဏံကီုတှ်ေ ဒြဟတ်ပရေၚ်ပညာမန်ပိုဲဂှ်ဟွံသၠုၚ်ပုဟ်ဟာ၊ သြန်ဂိတုလာပ်ဗဇဴအ္စာတြုံဗြဴတံဂှ်လေဝ် ညဳသာတုဲ ဗိုၚ်ထံက်ပၚ်ဂၠိုၚ်ၚ်ထေက်ကဵုအ္စာတြုံဗြဴမန်ပိုဲတံဒးနွံဒးဂွံအခေါၚ်ခိုဟ်ဟ်ဂှ်ဟွံခိုဟ်ဟာ၊ ဇၟာပ်ကောန်ဂကူမန်ပိုဲ စိုပ်အဝဲဂၠာဲသြန်လေပ်ဏောၚ်တှ်ေ ဗိုၚ်ထံက်ပၚ်ဒြဟတ်ပၞာန်မန်ပိုဲဇၟာပ်ပ်ဂိတုဂှ်ဟွံခိုဟ်ဟာ။
ယဝ်ဒှ်အာသာ်ဏံဏောၚ်တှ်ေ ပရေၚ်ပညာကွာန်မန်ပိုဲသီုဖအိုတ်ဂှ် ခြာဟွံလအ်ဟေၚ် မၞိဟ်ဂွံတိုန်ဘာမန်ဂှ်နွံအောန်စဵုကဵုဟွံမွယ်ဒှ်မာန်ဂှ် ဟိုတ်နူအခေါၚ် ဟိုတ်နူလာပ်ဗဇဴတၞဟ်ခြာဒၟံၚ်ညံၚ်ဍာ်ကဵုကၠေၚ်တုဲ ထ္ၜးဒုဟ်ဟီုဗျိမိမမန်တံဟွံဆာန်ဂကူဗီုဏံနဲတေံတှ်ေဟွံဂွံတုဲ ဗွဲသဘာဝပိုဲမၞိဟ်ဏံဂှ်အတ္တနွံဒၟံၚ်သီုညးဖအိုတ်တုဲ ဒးဗက်စလပါ်သာလပါ်လာပ်ဗဇဴဂၠိုၚ်ဂှ်ဒှ်ဓမ္မတာရ။
သြန်ဂိတုအ္စာတြုံဗြဴတံကဵုဟွံမာန်ကီု ဂွံကီုလေဝ် ထေက်ကြိုက်ဂွံဂှ်ဟွံဂွံအိုတ်တုဲ အ္စာတြုံဗြဴမန်ပိုဲတံလေဝ် တ္ၚဲဏံၜံက်ဒၟံၚ်ကခရံက် ဇိက်သွံဒြဟတ်အခိၚ်တုဲသၠာဲကဵုမသြန်ပ္ဍဲဂကူညးတၞဟ်ဂှ်နွံတဴဗဝ်သဝ်အဝ်ဂွံဆဵုမံၚ်ရ၊ ဘာအလဵုသဳ(ဘာဗၟာ)တ္ၚဲဏံလေဝ်နွံတဴဇၟာပ်ကွာန်မန်ပိုဲတံဂှ်လေဝ် ဍေံအုပ်ဓလီုကေတ်ထောံစိုတ်မိမကောန်ဂကူမန်အိုတ်ဟီုဂှ်တှ်ေ အ္စာဗြဴတြုံတံသ္ပအ္စာပ္ဍဲဘာအလဵုသဳမ္ဂးတှ်ေ အခေါၚ်ခိုဟ် သြန်ဂိတုခိုဟ်ဂွံမာန်ရ၊ ယဝ်ကွးဘာလဵုတိုန်ဘာအလဵုသဳဇၟာပ်ကွာန်မန်တံဂှ်ပၠန်လေဝ် စရိတ်နာနာဂှ်နွံအောန်တုဲ လဆောဝ်သၟးသၟးမုမိမတံဟွံဒးတီဟွံဒးဖအိုတ်သြန်ရ၊ နနဲသာ်ဏံဂှ် ဗၟာတံဍေံၚိတ်ကၠေံဓဝ်ပတေဟ်ကောန်ဂကူမန်ပိုဲ ဍေံၚိတ်ကၠေံဓဝ်ပတေဟ်မိမမန်ပိုဲသိုက်က်ဂှ် ဝိုတ်မံၚ်ဟွံဂွံအိုတ်ပုဟ်။
ဟိုတ်ဒှ်သာ်ဏံတုဲ ယဝ်ရဂကောံလဵုမွဲချဳဒရာၚ်သွာၚ်ဖဵုသွက်ၚုဟ်မးဂကူသ္ၚိတ်တ်မ္ဂးတှ်ေ မၞိဟ်ဂွံကဵုဒြဟတ်အောန်တုဲ ယဝ်နွံကဵုပေါဲသဘၚ် ယဝ်နွံကဵုပွမထ္ၜးစၚုဟ်မးပူဂဵု ပြိုၚ်လောဲ ပြိုၚ်ထ္ၜးကွဳစက်ကာကွဳလိုန်ဓါတ်မ္ဂးတှ်ေ ညဳသာကောံဒၟံၚ်ညံၚ်ရဴခၟတ်လုပ်ကသိုၚ်အိုတ်ရ။
အိုတ်ကၞောတ်သရောပ်ထောံဂၠိဂၠိတှ်ေ ကၠောန်မံၚ်တ္ၚဲဏံဂှ် ဗၠေတ်ပရေံဟွံဒှ်ဖဵုဂှ်ဟွံသေၚ်တုဲ သွာၚ်တၞဟ်ဟ်တံလေဝ် ယဝ်ပိုဲညဳသာတုပ်သၟဟ်ဏောၚ်တှ်ေ ဂကူပိုဲဂွံဆက်ကွာ်အာဂတတေံဂှ် မုဟွံဒးခက်ဒဂဵုဆုအကြာဍာန်တံဂှ် မိက်သ္ဂောံထ္ၜးလညာတ်သာ်ဏံရ။
ယဝ်ရချူဗၠေတ်ၜက်ပဵုဇီုကပိုက်နွံတှ်ေ သၠးအခေါၚ်ညိ၊ တၚ်ဂုဏ်ရအဴ ။
ไม่มีความคิดเห็น:
แสดงความคิดเห็น